How to Prepare Estimate || कसरी गर्ने ‘स्टिमेट’ तयार
सैद्धान्तिक रूपमा हासिल गरिएको ज्ञान तब मात्र पूरा हुन्छ जब हामी त्यसलाई व्यवहारमा उतार्छौँ । व्यवहार अर्थात् फिल्डमा गएर काम गर्छौं । फिल्डमा गएपछि विभिन्न किसिमको समस्याहरू आउन सक्छन् । त्यसैले त्यस्ता समस्यासँग जुध्नका लागि हामी पहिले नै तयार हुन जरुरी छ । त्यसमाथि इन्जिनियरको काम भनेको नितान्त सैद्धान्तिकभन्दा बढी व्यवहारिक हुन्छ । अर्थात् फिल्डमै काम गर्नुपर्ने हुन्छ ।
इन्जिनियररूले प्राविधिकको काम गर्ने भएकाले विकास निर्माणको कार्य गर्ने सिलसिलामा कहिलेकाहीँ गरिरहेको भन्दा भिन्न काम पनि आउन सक्छ । अर्थात् जब हामी इन्जिनियरहरू सरकारी निकायको काममा प्रवेश गर्छौं तब विकासको कामहरूमा टेन्डरिङ अथवा कुनै उपभोक्ता समिति गठन गरी काम गर्नुपर्ने हुन सक्छ ।
त्यस्तो अवस्था आएमा सबैभन्दा पहिले कुनै गाउँमा गएर उपभोक्ता समिति गठन गर्नुपर्छ । समिति गठन गरिसकेपछि प्रथम चल्ती (रनिङ) बिल पनि बनाउनुपर्ने हुन्छ । बिल बनाउन नजानेको अवस्थामा यसले धेरै समस्या निम्त्याउँछ । त्यसैले यहाँ बिल बनाउँदा कुनकुन कुरामा विशेष ध्यान दिनुपर्छ ? यस्तो बेलामा केकस्ता डकुमेन्टहरू चाहिन्छन् ? समितिमा बसेर काम गर्दा केके काम गर्नुपर्छ ? भन्नेबारे विस्तृत जानकारी राख्न जरुरी छ । तल दिइएका निम्न कुरामा ध्यान दियौं भने सजिलै काम गर्न सकिन्छ ।
कसरी गर्ने ‘स्टिमेट’ तयार
कामको सिलसिलमा कुनै गाउँमा गइसकेपछि त्यो गाउँमा विकासमुलक कामहरू केके हुन जरुरी छ त ? सबैभन्दा पहिले हामीले त्यसको विस्तृत जानकारी राख्नुपर्छ । किनभने कुनै ठाउँमा पहिरो जान सक्छ । बाढी आउन सक्छ । यस्ता समस्यालाई समाधान (प्रोटेक्ट) गर्नका लागि केकस्ता उपयुक्त उपायहरू अपनाउन सकिन्छ भन्नेबारे सचेत हुनुपर्छ ।
यसका लागि हामीले कंक्रिटिङ गर्न सक्छौं कि अथवा रोडहरूलाई बेस सबबेस ग्राभेलहरू उपलब्ध गराउन सक्छौं कि, रिटेनिङ वालहरू उपलब्ध गराउने कि, ‘कज वे’ बनाउने कि ? जेजे उपलब्ध गराउनु छ, सुरुमा त्यसको स्टिमेट तयार पार्नुपर्छ ।
स्टिमेट तयार पार्नका लागि हामीले माइक्रोसफ्ट एक्सेलमा गएर ‘स्टिमेटिङ सिट’ बनाउनुपर्छ । जसमा ‘क्रम संख्या’,‘डिस्क्रिप्सन अफ वर्क’, ‘युनिट’, ‘नम्बर’ ‘लम्बाइ (मिटरमा)’, ‘चौडाइ (मिटरमा)’, ‘गहिराइ/उचाइ (मिटरमा)’, ‘क्वान्टिटी’ र ‘रिमाक्र्स’ राखेर बनाउनुपर्छ । यसले हामीलाई धेरै सहयोग गर्छ ।
Comments
Post a Comment